# Wheelock's Latin, 6th edition
# Wheelock Chapter 34

GM 1 .. SALLUST'S VIEW OF HUMAN NATURE &
Omnes homines qui cupiunt praestare ceteris animalibus summa ope 
niti debent, ne vitam silentio transeant veluti pecora, quae natura 
finxit prona atque ventri oboedientia. 

GM 2 .. Sed nostra omnis vis in animo et corpore sita est; animi 
imperio, corporis servitio utimur; alterum nobis cum dis, alterum cum
beluis commune est. 

GM 3 .. Mihi rectius videtur gloriam quaerere ingenii quam virium 
opibus et, quoniam vita ipsa qua fruimur brevis est, memoriam nostri
quam maxime longam efficere. 

GM 4 .. Nam divitiarum et formae gloria fluxa atque fragilis est; 
virtus clara aeternaque habetur.

GM 5 .. Sed multi mortales, dediti ventri atque somno,
indocti incultique vitam sicuti peregrinantes egerunt; 
quibus profecto contra naturam corpus voluptati, anima oneri fuit. 

GM 6 .. Eorum ego vitam mortemque iuxta aestimo quoniam de utraque 
siletur. 

GM 7 .. Sed is demum mihi vivere atque frui anima videtur, qui
aliquo negotio intentus praeclari facinoris aut artis bonae famam 
quaerit.